Archives: Publications

ⵜⵓⵙⴰ ⴷ ⵜⴰⵏⵏⴰⵢⵜ ⴰⴷ ⴳ ⵓⵙⴰⵜⵉ ⵏ ⵜⵎⵢⴰⴷⴰⵙⵜ ⵏ ⵓⵙⵇⵇⵉⵎ ⵉ ⵜⴰⵣⵣⵓⵍⵉⵏ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ ⴷ ⵓⵔⵣⵣⵓ, ⵏⵏⴰ ⵎⵉ ⵉⵙⵔⵙ ⵉⵎⵏⵣⴰⵢⵏ ⴷ ⵉⵙⵜⴰⵢⵏ ⵉⵙⵏⵎⴰⵍⴰⵢⵏ ⵏⵏⵙ ⴳ ⵜⵎⵓⵖⵍⵉ ⵜⴰⵙⵟⵕⴰⵜⵉⵊⵉⵜ ⵏ ⵓⵙⵓⵖⴷ 2015-2030. ⴰⵔ ⵉⵙⵎⴽⴰⵍ ⵙ ⵜⵖⴰⵔⴰⵙⵜ ⵜⴰⵙⴳⵓⵎⴰⵏⵜ ⵜⴰⵣⵣⵓⵍⵉⵏ ⵏ ⵓⵙⵍⵎⴷ ⴷ ⵓⵙⵎⵓⵜⵜⴳ ⴷ ⵓⵔⵣⵣⵓ, ⵙⴳ ⵜⵖⵎⵔⵜ ⵏ ⵜⵎⴳⴳⴰⵢⵜ ⴳ ⵓⵎⵏⴰⴹ ⵏ ⵜⵓⵣⵣⵓⵍⵜ, ⵙ ⵓⵏⴰⵎⴽ ⵜⵉⵡⵓⵔⵉⵡⵉⵏ ⴷ ⵜⵎⵥⵍⴰⵢ ⴷ ⵜⵉⵍⴰⵍ, ⵙ ⵓⵙⵏⵜⵓ ⵅⴼ ⵡⴰⵏⴰⵡ ⵏ ⵉⵙⵍⵎⴰⴷⵏ ⴷ ⵜⵙⵍⵎⴰⴷⵉⵏ ⴷ ⵉⵎⵉⵏⵉⴳⵏ ⴷ ⵜⵎⵉⵏⵉⴳⵉⵏ ⴷ ⵉⵎⵙⵎⵓⵜⵜⵓⴳⵏ ⴷ ⵜⵎⵙⵎⵓⵜⵜⵓⴳⵉⵏ ⴳ ⵢⵉⴳⵔ ⵏ ⵓⵙⵎⵓⵜⵜⴳ ⴰⵣⵣⵓⵍⴰⵏ.

ⵉ ⵓⵙⵎⴽⵜⵉ, ⵜⴳⴰ ⵜⴰⵏⵏⴰⵢⵜ ⴰⴷ ⴰⴹⴼⴼⵓⵕ ⴷ ⵓⵙⵙⵖⴱⵓ ⵏ ⵉⵙⵓⵎⴰⵔ ⴷ ⵉⵙⵖⵍⴰⴼ  ⵏ ⵓⵙⵇⵇⵉⵎ ⴳ ⵓⵙⴳⵓⵎ, ⵏⵏⴰ ⵉⵙⵔⵙ ⴳ ⵜⴰⵏⴰⴹⵜ ⵏⵏⵙ ⵜⴰⵎⵉⵔⴰⵡⵜ ⴷ ⵉⴼⴼⵖⵏ ⴳ ⴼⴱⵕⴰⵢⵕ 2018 (ⵓⵟⵟⵓⵏ 3/2018), ⵅⴼ « ⴰⵙⵎⵖⵓⵔ ⵙ ⵜⴰⵣⵣⵓⵍⵉⵏ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ ⴷ ⵓⵔⵣⵣⵓ ⴷ ⵓⵙⵡⵓⴷⴷⵓ », ⵏⵏⴰ ⵉⵎⵢⴰⴷⴰⵙⵏ ⵜⴰⵣⵣⵓⵍⵉⵏ ⴰⴷ ⵙ ⵜⵎⵓⵖⵍⵉ ⵜⴰⵎⵔⵙⴰⵍⵜ ⵜⴰⵎⵉⵔⴰⵡⵜ ⵜⴰⵎⴰⵜⴰⵢⵜ.

ⴰⴳⴰⵎ ⵜⴰⵏⵏⴰⵢⵜ (ⵉⵍⵍⴰ ⵖⴰⵙ ⵜⵓⵜⵍⴰⵢⵜ ⵜⴰⵄⵔⴰⴱⵜ)

ⵜⵓⵙⴰ ⴷ ⵜⴰⵏⴰⴹⵜ ⴰⴷ ⴳ ⵓⵎⵏⴰⴹ ⵏ ⵓⵙⵙⵖⴱⵓ ⵏ ⵓⵙⵡⴰⵍⴰ ⵏ ⵜⵎⵓⵖⵍⵉ ⵜⴰⵙⵟⵕⴰⵜⵉⵊⵉⵜ 2015-2030 ⵉⵥⵍⵉⵏ ⵙ ⵓⵙⵓⵖⴷ ⵏ ⵓⵙⵍⵎⴷ ⴰⵏⴰⴼⵍⵍⴰ, ⵍⵍⵉⴳ ⵉⵏⵏⵓⵔⵣ ⴰⴷ ⵉⵙⵎⵓⵙⵙ ⴳ ⵓⵎⵏⴷ ⴰⴷⵉⵏⴰⵎⵉ ⴰⵎⴰⵏⴰⵡ ⵉ ⵓⵣⵣⵉⴳⵣ ⵏ ⵓⵏⴳⵔⴰⵡ ⵏ ⵓⵙⵍⵎⴷ ⴰⵏⴰⴼⵍⵍⴰ ⴳ ⵜⵎⵓⵔⵜ ⵏⵏⵖ.
ⵜⴻⵜⵜⵓⵙⵏⵎⴰⵍⴰ ⵜⴰⵏⴰⴹⵜ ⴳ 7 ⵏ ⵜⵎⵙⵙⵉⵍⵉⵢⵉⵏ ⴷ 58 ⵏ ⵉⵙⵖⵍⴰⴼ, ⵉⵡⵉⵏ ⴷ ⵅⴼ ⵉⵣⴳⴰⵍⵏ ⵉⵙⵖⵏⴰⵏⵏ ⵏ ⵓⵏⴳⵔⴰⵡ ⵏ ⵓⵙⵍⵎⴷ ⴰⵏⴰⴼⵍⵍⴰ, ⵜⵏⵏⵓⵔⵣ ⴰⵙⵜⵔⴰⵔ ⴷ ⵓⵙⵉⵖⵉⵢ ⵏ ⵓⵏⴳⵔⴰⵡ ⴰⴷ ⴳ ⵢⴰⵏ ⵓⴱⵔⵉⴷ ⵉⵣⵎⵔⵏ ⴰⴷ ⵜ ⵢⵙⵙⵉⵡⴹ ⵖⵔ ⵜⵎⴷⵔⴰⵡⵜ ⴳ ⵜⴳⵎⵉ ⵏ ⵜⵎⵓⵔⵜ ⵏⵏⵖ.
ⵜⵉⵡⵉ ⴷ ⵜⴰⵏⴰⴹⵜ ⴳ ⵓⵙⴳⵓⵎ ⴰⴷ ⵙ ⵓⴱⵔⵉⴷ ⵏ ⵜⵓⵎⴰⵢⵉⵏ ⴰⴷ :
ⵉⴼⵔⴷⵉⵙⵏ ⵉⵎⴰⴽⴰⵣⵏ ;
ⵜⵉⵔⵙⴰⵍ ⵜⵉⵎⵙⵙⴰⵖⵓⵍⵉⵏ ;
ⵜⴰⵎⵢⴰⴷⴰⵙⵜ ⵜⴰⵏⴱⵔⵉⴷⵜ.
ⴰⴳⴰⵎ ⵜⴰⵏⴰⴹⵜ

ⴰⴳⴰⵎ ⵜⵉⵡⵓⵔⵉⵡⵉⵏ ⵏ ⵜⵉⵏⴰⵡⵜ

ⵜⵓⵙⴰ ⴷ ⵜⴰⵏⵏⴰⵢⵜ ⴰⴷ ⴳ ⵓⵙⴳⵓⵎ ⵏ ⵓⵙⵍⵎⴷ ⵏ ⵎⴷⴷⵏ ⵉⵍⵍⴰⵏ ⴳ ⵡⴰⴷⴷⴰⴷ ⵏ ⵓⴽⴽⵓⵛⵎ ⴳ ⵢⴰⵜ ⵜⵎⵔⴰⵔⵓⵜ ⵏ ⵉⵏⵓⵔⵣⵏ ⴷ ⵉⵙⵉⵔⵉⵎⵏ ⵉⵏⴰⵎⵓⵏⵏ ⴷ ⵉⵎⵔⵙⴰⵍⵏ ⴳ ⵓⵢⵏⵏⴰ ⵉⵣⴷⵉⵏ ⴷ ⵓⵢⴰⴷ, ⵉⴳⴰ « ⵜⴰⵡⵔⵉⵇⵜ ⵏ ⵓⴱⵔⵉⴷ ⵖⵔ ⵢⴰⵏ ⵓⵙⴳⵎⵉ ⴰⵎⴰⴷⴰⴼ, ⴰⵎⵙⵙⵓⵎⵓ ⴷ ⵉⵕⵡⴰⵏ »

ⵜⴻⵜⵜⵓⵚⴽⴰ ⵜⴰⵏⵏⴰⵢⵜ ⵏ ⵓⵙⵇⵇⵉⵎ ⴳ ⵓⵙⴳⵓⵎ ⵏ ⵓⵙⵍⵎⴷ ⵏ ⵎⴷⴷⵏ ⵉⵍⵍⴰⵏ ⴳ ⵡⴰⴷⴷⴰⴷ ⵏ ⵓⴽⴽⵓⵛⵎ ⵅⴼ ⵓⵢⴰⴷ :

ⵉⴱⵓⵔⵣⵏ ⴷ ⵉⵙⴰⵖⵓⵍⵏ ;

ⵉⵔⵎⵎⵓⵙⵏ ⵉⴷⵙⵍⴰⵏⵏ ;

ⵉⵙⴼⴽⴰ ⵉⵎⴰⴽⴰⵣⵏ ⴷ ⵜⵎⵓⴽⵔⵉⵙⵉⵏ ⵜⵉⵏⵎⵎⴰⵍⵉⵏ ;

ⵉⵙⵉⵣⵡⵔⵏ ⴷ ⵉⵙⵖⵍⴰⴼ.

ⴰⴳⴰⵎ ⵜⴰⵏⵏⴰⵢⵜ (ⵉⵍⵍⴰ ⵖⴰⵙ ⵜⵓⵜⵍⴰⵢⵜ ⵜⴰⵄⵔⴰⴱⵜ)

ⴰⵡⵜⵜⴰⵙ ⵏ ⵜⴰⵏⴰⴹⵜ ⴰⴷ ⵏ ⵓⵙⵇⵇⵉⵎ ⴳ ⵓⵙⴳⵓⵎ ⵏ « ⵜⵉⵎⵙⵎⵓⵏⵉⵏ ⵏ ⵢⵎⵎⴰⵜⵙⵏ ⴷ ⴱⴰⴱⴰⵜⵙⵏ ⴷ ⵉⵎⴰⵡⵍⴰⵏ ⵏ ⵉⵏⵍⵎⴰⴷⵏ : ⴰⵎⴷⵔⴰⵡ ⴰⴷⵙⵍⴰⵏ ⴳ ⵢⵉⵡⴹ ⵖⵔ ⵜⵉⵏⵎⵍ ⵏ ⵓⵙⵙⵓⵎⵓ ⴷ ⵜⵕⵡⵉ ⴷ ⵓⵙⵙⵎⵖⵔ » ⵉⴳⴰ ⴰⵙⵉⵜⴳ ⵏ ⵜⵉⵣⵉ ⵜⴰⵏⴰⵎⵎⴰⵙⵜ ⵏⵏⴰ ⴷ ⵜⵉⵡⵉ ⵜⵎⵓⵖⵍⵉ ⵜⴰⵙⵟⵕⴰⵜⵉⵊⵉⵜ ⵏ ⵓⵙⵓⵖⴷ ⵉ ⵜⵎⵙⵜⴳⴳⴰⵔⵜ ⵏ ⵜⴰⵡⵊⵉⵡⵉⵏ ⴷ ⵉⴳⵔⴰⵡⵏ ⵜⵏ ⵉⵙⵎⴷⵢⴰⵏ ⴳ ⵜⵏⴽⵔⴰ ⵙ ⵓⵙⴽⴽⵉⵏ ⴰⵙⴳⵎⴰⵏ.
ⴷⴰ ⵜⵙⵇⵙⴰ ⵜⴰⵏⴰⴹⵜ ⴰⴷ ⴰⴷⵖⴰⵔ ⴰⵎⵉⵔⴰⵏ ⵏ ⵉⴳⵔⴰⵡⵏ ⴷ ⵜⵡⵓⵔⵉ ⵏⵏⵙⵏ, ⴳ ⵓⵡⵜⵜⴰⵙ ⵏ ⴰⴷ ⵜⵜⵓⵙⵓⵎⵔⵏ ⵉⵙⴰⴷⴰⴼⵏ ⵉⵖⵉⵢⵏ ⴰⴷ ⵉⵏⴽⵔ ⵙ ⵡⴰⴷⴷⴰⴷⵏ ⵏⵏⵙⵏ ⵉⵙⵏⵎⴰⵍⴰⵢⵏ, ⴷ ⵓⵙⵡⵓⵜⵜⵓ ⴰⵎⴰⵢⵏⵓ ⵏ ⵜⵙⵎⵉⴳⵍⵉⵏ ⴷ ⵜⵉⵍⴰⵍ ⵏⵏⵙⵏ, ⴷ ⵓⵙⴷⵖⵉ ⴰⵎⴰⵜⴰⵢ ⵏ ⵉⴹⵕⵉⵚⵏ ⵉⵙⵏⵎⴰⵍⴰⵢⵏ ⴷ ⵉⵙⵍⴳⴰⵏⵏ ⵏⵏⴰ ⵉⴷⵙⵏ ⵉⵣⴷⵉⵏ, ⵙ ⵓⵎⵙⴰⵙⴰ ⴷ ⵉⵙⵡⴰⵍⴰⵜⵏ ⵏ ⵜⵎⵓⵖⵍⵉ ⵜⴰⵙⵟⵕⴰⵜⵉⵊⵉⵜ ⵏ ⵓⵙⵓⵖⴷ 2015-2030.
ⵜⵉⵡⵉ ⴷ ⵜⴰⵏⴰⴹⵜ ⵅⴼ ⵓⵙⴳⵓⵎ ⴰⴷ ⴳ ⵜⵓⵎⴰⵢⵉⵏ ⴰⴷ :
ⴰⴽⴰⵣ ⵏ ⵜⵉⵍⴰⵡⵜ ⵜⴰⵎⵉⵔⴰⵏⵜ ⵏ ⵜⵎⵙⵎⵓⵏⵉⵏ ⵏ ⵢⵎⵎⴰⵜⵙⵏ ⴷ ⴱⴰⴱⴰⵜⵙⵏ ⴷ ⵉⵎⴰⵡⵍⴰⵏ ⵏ ⵉⵏⵍⵎⴰⴷⵏ ;
ⵉⵣⵣⵉⴳⵉⵣⵏ ⵉⵙⵏⵉⵎⴰⵍⵏ ⵏ ⵓⵙⵙⵎⵖⵓⵔ ⵙ ⵡⴰⴷⴷⴰⴷ ⴷ ⵜⵉⵍⴰⵍ ⵏ ⵜⵎⵙⵎⵓⵏⵉⵏ ⴰⴷ.

ⴰⴳⴰⵎ ⵜⴰⵏⴰⴹⵜ

ⵜⵉⵡⵉ ⴷ ⵜⴰⵏⴰⴹⵜ ⴰⴷ, ⵙ ⵉⵎⵥⵍⵉ, ⵅⴼ ⵓⵙⵎⵓⵜⵜⴳ ⴰⵣⵣⵓⵍⴰⵏ ⴰⴷⵙⵍⴰⵏ, ⴰⵔ ⵜⵔⵣⵣⵓ ⴰⴷ ⵜⵙⵓⵎⵔ ⵢⴰⵏ ⵓⵙⴰⵜⵉ ⴰⵙⴰⵖⵓⵍ ⴰⵙⵟⵕⴰⵜⵉⵊⵉ ⴷ ⵢⴰⵜ ⵜⴽⴰⵕⴹⴰ ⵏ ⵓⴱⵔⵉⴷ ⴳ ⵓⵡⵜⵜⴰⵙ ⵏ ⵡⴰⵍⴰⵙ ⵏ ⵜⵓⵚⴽⴰ ⵏ ⵓⵙⵎⵓⵜⵜⴳ ⴰⵣⵣⵓⵍⴰⵏ ⴳ ⵜⵎⵓⵔⵜ ⵏⵏⵖ. ⵜⴻⵜⵜⵓⵙⵏⵎⴰⵍⴰ ⵜⴰⵏⴰⴹⵜ ⴳ ⵓⵢⴰⴷ :
– ⴰⴳⵣⵣⵓⵎ ⴰⵎⵣⵡⴰⵔⵓ ⵡⵉⵏ ⵡⴰⴽⴰⵣ ⵏ ⵜⵉⵍⴰⵡⵜ ⵏ ⵡⴰⴷⴷⴰⴷ ⵏ ⵓⵙⵎⵓⵜⵜⴳ ⴰⵣⵣⵓⵍⴰⵏ ;
– ⴰⴳⵣⵣⵓⵎ ⵡⵉⵙⵙ ⵙⵉⵏ, ⴷⴰ ⵉⵙⵙⵓⵎⵓⵔ ⵜⵉⵙⵓⵔⴰ/ ⵜⵉⵔⵙⴰⵍ ⴳ ⵓⵡⵜⵜⴰⵙ ⵏ ⵡⴰⵍⴰⵙ ⵏ ⵜⵓⵚⴽⴰ ⵏ ⵓⵙⵎⵓⵜⵜⴳ ⴰⵣⵣⵓⵍⴰⵏ ⴰⴷⵙⵍⴰⵏ ;
– ⵉⵏⵖⵍⴰⴼ ⵉ ⵓⴹⴼⴼⵓⵕ ⵏ ⵓⵙⵏⴼⵍ.

ⴰⴳⴰⵎ ⵜⴰⵏⴰⴹⵜ
ⴰⴳⴰⵎ ⵏ ⵜⴳⴹⵡⵉⵜ

ⵉⵙⵏⵎⴰⵍⴰ ⵓⴳⵔⴰⵡ ⴰⵏⴰⵎⵓⵔ ⵏ ⵓⵙⵓⵜⴳ ⵖⵓⵔ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ ⴷ ⵓⵔⵣⵣⵓ ⴰⵎⴰⵙⵙⴰⵏ, ⵢⴰⵜ ⵜⵉⵏⴰⵡⵜ ⵜⴰⵎⴰⴹⵍⴰⵏⵜ ⵅⴼ ⵓⵙⴳⵓⵎ « ⴰⵙⵓⵜⴳ ⵏ ⵓⵔⵣⵣⵓ ⴰⵎⴰⵙⵙⴰⵏ : ⵉⵎⵙⴰⵔⴰⵙⵏ ⴷ ⵜⵖⴰⵔⴰⵙⵉⵏ ⴷ ⵉⵎⴰⵙⵙⵏ » ⵓⵙⵙⴰⵏ ⵏ 6 ⴷ 7 ⴷⵓⵊⴰⵎⴱⵉⵔ 2017

ⵉⵡⴰⵜⵙ ⵓⴳⵔⴰⵡ ⴰⵏⴰⵎⵓⵔ ⵏ ⵓⵙⵜⴰⵍ ⵙ ⵜⵉⵏⴰⵡⵜ ⴰⴷ, ⴰⴷ ⵉⵙⵏⵓⵍⴼⵓ ⵢⴰⵏ ⵓⵣⵎⵣⵣⵓ ⵏ ⵓⵎⵙⴰⵡⴰⵍ ⴷ ⵓⵙⴼⵙⵉ ⴰⵎⵣⴰⵣⴰⵍ, ⵏ ⵓⵎⵙⴰⵔⴰⵙⵏ ⵏ ⵓⵙⵜⴰⵍ ⵏ ⵓⵔⵣⵣⵓ ⴰⵎⴰⵙⵙⴰⵏ ⴳ ⵜⵎⵓⵔⴰ ⵉⵍⵍⴰⵏ ⴳ ⵓⴱⵔⵉⴷ ⵏ ⵜⴳⵎⵉ, ⵙ ⵡⴰⵍⵍⴰⵍ ⵏ ⵓⵙⵇⵙⵉ ⵏ ⵉⵎⴰⵙⵙⵏ ⵏ ⵓⵙⵜⴰⵍ ⴷ ⵡⴰⵜⵉⴳ ⵏ ⵓⵎⵙⴰⵙⴰ ⵏⵏⵙ ⴷ ⵉⵏⴳⵔⴰⵡⵏ ⵏ ⵓⵔⵣⵣⵓ ⴰⵎⴰⵙⵙⴰⵏ ⴳ ⵜⵎⵓⵔⴰ ⵢⴰⴷ.

ⴰⵎⵓⵏ ⴳ ⵜⵉⵏⴰⵡⵜ ⴰⴷ ⵜⴰⵎⴰⴹⵍⴰⵏⵜ, ⴽⵕⴰⴹⵜ ⵜⵎⵔⴰⵡⵉⵏ ⵏ ⵉⵎⵓⵣⴰⵢ ⴷ ⵉⵎⵥⵍⵉⵢⵏ ⴳ ⵢⵉⴳⵔ ⵏ ⵓⵙⵜⴰⵍ ⵏ ⵓⵔⵣⵣⵓ ⴰⵎⴰⵙⵙⴰⵏ, ⵙⴳ ⴽⵉⴳⴰⵏ ⵏ ⵜⵎⵓⵔⴰ (ⴽⴰⵏⴰⴷⴰ, ⵍⴱⵕⴰⵣⵉⵍ, ⵍⵀⵉⵏⴷ, ⴼⵕⴰⵏⵙⴰ, ⵏⴰⵕⵡⵉⵊ, ⵍⵓⴱⵏⴰⵏ, ⵚⴱⴰⵏⵢⴰ, ⵎⴰⵔⵉⴽⴰⵏ, ⴽⵕⵓⵡⴰⵜⵉⵢⴰ, ⴱⵕⵉⵟⴰⵏⵉⵢⴰ, ⴱⵍⵊⵉⴽⴰ) ⵔⵏⵓ ⵢⴰⵙⵏ ⵉⵎⵓⵣⴰⵢ ⵉⵎⵖⵔⴰⴱⵉⵢⵏ, ⵓⵎⵥⵏ ⴰⴽⴽⵯ ⴰⵡⴰⵍ ⵙⵉⵏ ⵡⵓⵙⵙⴰⵏ ⵅⴼ ⴽⵉⴳⴰⵏ ⵏ ⵉⵙⴳⵓⵎⵏ ⵉⵣⴷⵉⵏ ⴷ ⵓⵔⵣⵣⵓ ⴰⵎⴰⵙⵙⴰⵏ ⴷ ⵓⵙⵜⴰⵍ ⵏⵏⵙ.

ⴰⴳⴰⵎ ⵜⵉⵡⵓⵔⵉⵡⵉⵏ ⵏ ⵜⵉⵏⴰⵡⵜ

ⴰⵡⵜⵜⴰⵙ ⵏ ⵜⴰⵏⴰⴹⵜ ⴰⴷ ⵜⴰⵎⵙⵜⴰⵍⵜ ⵏⵏⴰ ⵉⵙⵙⴽⵔ ⵓⴳⵔⴰⵡ ⴰⵏⴰⵎⵓⵔ ⵏ ⵓⵙⵓⵜⴳ ⵖⵓⵔ ⵓⵙⵇⵇⵉⵎ ⴰⵏⴰⴼⵍⵍⴰ ⵉ ⵓⵙⴳⵎⵉ ⴷ ⵓⵙⵎⵓⵜⵜⴳ ⵉⴳⴰ ⴰⵙⵖⴰⵍ ⵏ ⵜⵕⵡⵉ ⴷ ⵓⵖⵓⴷⵓ ⵏ ⵓⵙⵍⵎⴷ ⴰⵏⴰⴼⵍⵍⴰ ⴳ ⵜⵎⵔⵙⴰⵍ ⵙ ⵡⴰⴷⴰⴼ ⵉⵏⵏⵓⵕⵥⵎⵏ.
ⴷⴼⴼⵉⵔ ⵓⴼⵓⵖ ⵏ ⵜⵎⵓⵖⵍⵉ ⵜⴰⵙⵟⵕⴰⵜⵉⵊⵉⵜ 2015-2030 ⴷ ⴷⴰⵜ ⵜⴼⵉⴽⴽⴰⵛ ⴰⴽⴽⵯ ⵏⵏⴰ ⵉⵍⵍⴰⵏ ⴷⴰⵜ ⵜⵓⵎⴰⵢⵜ ⴰⴷ ⵜⴰⴷⵙⵍⴰⵏⵜ ⵏ ⵓⵙⵍⵎⴷ ⴰⵏⴰⴼⵍⵍⴰ, ⵜⵏⵏⵓⵔⵣ ⵜⴰⵏⴰⴹⵜ ⴰⴷ ⴳ ⵓⵙⵜⴰⵍ ⵓⵏⵖⵉⴷ ⴰⵏⵉⵍⴰⵡ ⵏ ⵜⵙⵔⵜⵉⵜ ⵜⴰⴳⴷⵓⴷⴰⵏⵜ ⵉⵣⴷⵉⵏ ⴷ ⵓⵙⴽⴽⵉⵏ ⴰⴷ. ⴰⵔ ⵉⵔⵣⵣⵓ ⴷⵉⵖ ⴳ ⵜⵢⴰⴼⵓⵜⵉⵏ ⵏⵏⵙ ⵜⵉⴳⵓⵏⵙⴰⵏⵉⵏ ⴷ ⵜⵣⵎⵎⴰⵔ ⵜⵉⵥⵕⴼⴰⵏⵉⵏ ⵙⴳ ⵖⵓⵔ ⵓⵡⴰⵏⴽ. ⵎⴰⵛⴰ ⵍⵍⵉⴳ ⴳⴳⵓⵜⵏ ⵉ ⵓⵙⵜⴰⵍ ⴰⴷ ⵉⵎⵏⵉⴷⵏ, ⵉⵜⵜⵓⵙⴽⵔ ⵓⵙⵜⴰⵍ ⴷ ⵓⵙⴼⵙⵢ ⵉ ⵓⵏⴳⵔⴰⵡ ⵏ ⵜⵓⵔⴰⴳⵜ – ⵎⴰⵙⵟⵕ – ⴷⵓⴽⵜⵓⵔⴰ ⴷ ⵓⵏⴱⴰⴹ ⵏ ⵉⵙⴰⴳⵎⵏ ⵉⵏⴼⴳⴰⵏⵏ ⴷ ⵓⵙⴷⵓⵙ ⴰⵏⴰⵎⵓⵏ ⵙ ⵜⵖⴰⵔⴰⵙⵜ ⵉⵖⴱⴰⵏ.
ⵜⴳⴳⵔⴰ ⵜⴰⵏⴰⴹⵜ ⴰⴷ ⵜⴰⵎⵙⵜⴰⵍⵜ ⵙ ⵓⵙⵉⴹⵏ ⵏ ⵜⵏⵥⵕⴰ ⴷ ⵉⵎⵙⵓⵔⵙⵏ ⵉⴷⵙⵍⴰⵏⵏ ⵏⵏⴰ ⵉⵜⵜⵏⵏⴰⵍⵏ ⴰⵙⵍⵎⴷ ⴰⵏⴰⴼⴰⵍⵍⴰ ⴰⵙⴷⴰⵡⴰⵏ ⴳ ⵍⵎⵖⵔⵉⴱ ⴰⴼⴰⴷ ⴰⴷ ⵜⵜⵓⵢⴰⴼⵏⵜ ⵜⵎⴳⴳⴰⵢ ⵉⵖⵉⵢⵏ ⴰⴷ ⵉⵙⵓⴳⴳⵣ ⵜⴰⵎⵓⵖⵍⵉ ⵜⴰⵙⵟⵕⴰⵜⵉⵊⵉⵜ ⴳ ⵓⵎⵏⵉⴷ ⵏ 2030.

ⴰⴳⴰⵎ ⵜⴰⵏⴰⴹⵜ