« ⵉⵙⵏⵓⴱⴳ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴷ ⵡⵉⵙⵙ ⵙⴹⵉⵙ, ⵕⴱⴱⵉ ⴰⴷ ⵜ ⵉⵏⵚⵕ, ⴰⵙⵙ ⵏ 14 ⵏⵓⵡⴰⵏⴱⵉⵔ 2022, ⴳ ⵉⵖⵔⵎ ⴰⴳⵍⴷⴰⵏ ⴳ ⵕⵕⴱⴰⵟ, ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⵉⵙⵔⵙ ⵜ ⴷ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⴰⵏⴰⴼⵍⵍⴰ ⵉ ⵓⵙⴳⵎⵉ ⴷ ⵓⵙⵎⵓⵜⴳⴳ ⴷ ⵓⵔⵣⵣⵓ ⴰⵎⴰⵙⵙⴰⵏ.
ⵉⵡⵏⴰⵏ ⵏ ⵓⵙⵏⵓⴱⴳ ⴰⴷ, ⵉⴼⴽⴰ ⴱⴰⴱ ⵏ ⵡⴰⴷⴷⵓⵔ, ⵕⴱⴱⵉ ⴰⴷ ⵜ ⵉⵄⵣⵣⴰ, ⵉ ⵓⵏⵙⵙⵉⵅⴼ ⴰⵎⴰⵢⵏⵓ ⵏ ⵓⵙⵇⵇⵉⵎ ⵉⵙⵡⴰⵍⴰⵏ ⵉⵎⴰⵜⵜⴰⵢⵏ ⴳ ⵓⴱⵔⵉⴷ ⵏ ⵓⵙⵎⵓⵙⵙ ⵉⵕⵡⴰⵏ ⵏ ⵜⵙⵎⵉⴳⵍⵉⵏ ⵏⵏⴰ ⵢⴰⵙ ⵉⵜⵜⵓⴼⴽⴰⵏ ⵙⴳ ⵓⴷⵓⵙⵜⵓⵔ ⵉ ⵜⵎⵔⵙⵍⵜ ⴰⴷ ⴳ ⵓⵢⵏⵏⴰ ⵉⵣⴷⵉⵏ ⴷ ⵜⵏⴽⵔⴰ ⵙ ⵜⵉⵏⵎⵍ ⵜⴰⵎⵖⵔⴰⴱⵉⵢⵜ, ⴷ ⵜⵓⴽⴽⵉ ⵏ ⵜⴰⵏⵏⴰⵢⵉⵏ ⵅⴼ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴷ ⵜⵎⵙⴰⵔ ⵜⵉⵏⴰⵎⵓⵔⵉⵏ ⵏⵏⴰ ⵉⵣⴷⵉⵏ ⴷ ⵓⵙⴳⵎⵉ ⴷ ⵓⵙⵎⵓⵜⵜⴳ ⴷ ⵓⵔⵣⵣⵓ ⴰⵎⴰⵙⵙⴰⵏ, ⴷ ⵜⵎⴷⵔⴰⵡⵜ ⴳ ⵓⵙⵓⵜⴳ ⵏ ⵜⵙⵔⵜⴰⵢ ⴷ ⵉⵖⴰⵡⴰⵙⵏ ⵉⴳⴷⵓⴷⴰⵏⵏ ⴳ ⵢⵉⴳⵔ ⴰⴷ ⴰⵎⵉⴳⴰⵔ ⵉ ⵉⵎⴰⵍ ⵏ ⵍⵎⵖⵔⵉⴱ.
ⵉⵙⴷⴷⴻⴷ ⴷⵉⵖ ⴱⴰⴱ ⵏ ⵡⴰⴷⴷⵓⵔ ⵅⴼ ⵓⵣⵓⵛⵛⵍ ⵏ ⵓⴹⴼⴼⵓⵕ ⵏ ⵓⵙⵇⵇⵉⵎ, ⵍⵍⵉⴳ ⵉⴳⴰ ⵜⴰⵎⵔⵙⵍⵜ ⵜⴰⵎⵛⴰⵡⵕⵜ, ⵉ ⵓⵙⵓⵖⴷ ⵏ ⵓⵏⴳⵔⴰⵡ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ, ⵙ ⵓⵙⵎⵣⴷⴰⵢ ⴷ ⵢⵉⴳⵔⴰⵏ ⵉⵎⵏⴱⴰⴹⵏ ⴷ ⵜⵎⵔⵙⴰⵍ ⵉⵜⵜⵓⵡⴰⵜⵙⵏ, ⴳ ⵓⴱⵔⵉⴷ ⵏ ⵢⵉⵡⴹ ⵖⵔ ⵉⵡⵜⵜⴰⵙⵏ ⵉⴷⵙⵍⴰⵏⵏ ⴳ ⵓⵢⵏⵏⴰ ⵉⵣⴷⵉⵏ ⴷ ⴰⵙⵙⵎⵖⵔ ⵏ ⵜⵕⵡⵉ ⵏ ⵓⵙⵍⵎⴷ ⴳ ⵉⵙⵡⵉⵔⵏ ⵏⵏⵙⵏ ⴰⴽⴽⵯ, ⴷ ⵓⵙⵉⴽⵙⵍ ⵏ ⵉⵣⵎⴰⵣ ⴳ ⵢⵉⴳⵔ ⴰⴷ, ⴷ ⵓⵏⵖⴰⴷ ⵏ ⵜⵓⵜⵍⴰⵢⵉⵏ ⵜⵉⴱⵕⵕⴰⵏⵉⵢⵉⵏ, ⴷ ⵓⵙⴱⵖⵙ ⵏ ⵓⵔⵣⵣⵓ ⴰⵎⴰⵙⵙⴰⵏ, ⵙ ⵓⵢⵏⵏⴰ ⵉⵜⵜⴰⵡⵙⵏ ⴳ ⵓⵙⵥⴹⴰⵕ ⵏ ⵓⴷⴳⴰⵔ ⴰⵏⴼⴳⴰⵏ ⴰⵏⴰⵎⵓⵔ, ⴷ ⵓⵙⵙⵓⵀⵏ ⵏ ⵡⴰⴷⴰⴼ ⵏ ⵜⵙⵓⵜⵉⵡⵉⵏ ⵏ ⵜⵓⵔⴰ ⴷ ⵜⵉⵏ ⵉⵎⴰⵍ ⴳ ⵜⴷⵉⵏⴰⵎⵉⵜ ⵜⴳⵎⵉ ⵏⵏⴰ ⵉⵍⵍⴰⵏ ⴳ ⵜⵎⵓⵔⵜ ⵏⵏⵖ.