ⴷⴰ ⵜⵙⵙⵎⵏⵉⴷ ⵜⴰⵏⴰⴹⵜ ⴰⴷ ⵜⴰⵏⴰⵎⵓⵔⵜ ⵜⴰⵖⵓⵔⵉ ⵅⴼ ⵜⵙⵏⵉⴳⵉⵜ ⵏ ⵉⵏⵍⵎⴰⴷⵏ ⴳ ⵍⵄⵎⵕ ⵏ 15 ⵏ ⵉⵙⴳⴳⵯⴰⵙⵏ ⴳ ⵓⵖⴰⵡⴰⵙ ⴰⴳⵔⴰⵖⵍⴰⵏ PISA 2018, ⵉⴳⴰ ⵉⵏⵉⴳ ⵏⵏⴰ ⴷⴰ ⵜⵙⵙⴽⴰⵔ ⵜⵎⵙⴷⵓⵙⵜ ⵏ ⵓⵎⵢⴰⵡⴰⵙ ⴰⴷⴰⵎⵙⴰⵏ ⴷ ⵜⵉⴳⵎⵉ OCDE ⴽⵓ ⴽⵕⴰⴹ ⵉⵙⴳⴳⵯⴰⵙⵏ, ⴰⵢⴰ ⵙⴳ ⵓⵙⴳⴳⵯⴰⵙ ⵏ 2000, ⵉⵣⴷⵉ ⴷ ⵓⵙⵓⵜⴳ ⵏ ⵜⵙⵏⵉⴳⵉⵜ ⵏ ⵉⵏⵍⵎⴰⴷⵏ ⴳ ⵍⵄⵎⵕ ⵏ 15 ⴳ ⵢⵉⴳⵔⴰⵏ ⵏ ⵢⵉⴽⵣ ⵏ ⵉⴹⵕⵉⵚⵏ ⵉⵜⵜⵢⴰⵔⴰⵏ ⴷ ⵜⵓⵙⵏⴰⴽⵜ ⴷ ⵜⵓⵙⵙⵏⴰ.
ⵙ ⵓⵎⵣⴰⵔⴰⵢ ⴷ ⵢⵉⵏⵉⴳⵏ ⵉⵎⵙⵓⵜⴳⵏ ⵢⴰⴹⵏ ⵅⴼ ⵉⵎⵄⵉⵏⵏ ⵏ ⵉⵏⵍⵎⴰⴷⵏ, ⵉⴱⵓⵔⵣ ⵓⵖⴰⵡⴰⵙ PISA ⵙ ⵓⵙⵜⴰⵍ ⵏ ⵜⵙⵏⵉⴳⵉⵜⵉⵏ ⵜⵉⵎⴰⵜⴰⵢⵉⵏ ⵏⵏⴰ ⵔⴰⴷ ⵉⵔⵉⵏ ⵉⵄⵔⵔⵉⵎⵏ ⵏ 15 ⵏ ⵉⵙⴳⴳⵯⴰⵙⵏ ⴳ ⵍⵄⵎⵕ ⵉ ⵓⵎⵓⵔⵙ ⴳ ⵜⵓⴷⵔⵜ ⵏⵏⵙⵏ ⵜⴰⵣⵣⵓⵍⴰⵏⵜ ⴷ ⵜⵏⴰⵎⵓⵏⵜ ⴷ ⵜⵏⵉⵎⴰⵏⵜ. ⵙ ⵓⵢⴰ, ⴰⵖⴰⵡⴰⵙ PISA ⵓⵔ ⴷⴰ ⵉⵙⵜⴰⵍ ⵜⵓⵙⵙⵏⵉⵡⵉⵏ ⵜⵓⵎⵄⵉⵏⵉⵏ ⵏ ⵉⵏⵍⵎⴰⴷⵏ ⵎⴰⵛⴰ ⵜⴰⵣⵎⵔⵜ ⵏⵏⵙⵏ ⵅⴼ ⵓⵙⵡⵓⵔⵉ ⵏ ⵜⵓⵙⵙⵏⵉⵡⵉⵏ ⴰⵏ ⴷ ⵓⵙⵏⵎⴽⵍ ⵏⵏⵙⵏⵜ ⴳ ⵜⵓⴷⵔⵜ ⵏ ⴽⵓ ⵢⴰⵙⵙ. ⴰⵔ ⵉⵜⵜⵉⵏⵉⴳ ⵓⵖⴰⵡⴰⵙ ⴰⴷ ⵜⵉⵣⵉ ⵏ ⵓⵃⵣⵣⵎ ⵏ ⵉⵄⵔⵔⵉⵎⵏ ⴰⴷ, ⵢⵉⵡⴹⵏ ⵍⵄⵎⵕ ⵏ ⵓⵜⵔⴳ, ⴳ ⵜⵎⴷⵔⴰⵡⵜ ⴳ ⵜⵓⴷⵔⵜ ⵜⴰⵏⴰⵎⵓⵏⵜ ⴷ ⵡⵓⵎⵓ ⴳ ⵜⴷⴰⵎⵙⴰ ⵉⵚⴽⴰⵏ ⴽⵉⴳⴰⵏ ⵅⴼ ⵜⵓⵙⵙⵏⴰ ⴷ ⵜⵉⴽⵏⵓⵍⵓⵊⵉⵢⵉⵏ.
ⴳⴳⵓⵜⵏⵜ ⵜⵎⵓⵔⴰ ⵏ ⵜⴷⴰⵎⵙⵉⵡⵉⵏ ⵏⵏⴰ ⵉⵍⵜⵖⵏ ⴳ ⵢⵉⵏⵉⴳ ⴰⴷ. ⵢⴰⵎⵓ ⵍⵎⵖⵔⵉⴱ, ⵜⴰⵙⴳⴰ ⵏ 78 ⵏ ⵜⵎⵓⵔⵜ ⴷ ⵜⴷⴰⵎⵙⴰ, ⵙ ⵢⵉⵔⵎ ⴰⴷ ⵜⵉⴽⴽⵍⵜ ⵜⴰⵎⵣⵡⴰⵔⵓⵜ ⴰⵙⴳⴳⵯⴰⵙ ⵏ 2018, ⵙ ⵡⵓⵎⵓ ⵏ 7218 ⵏ ⵉⵏⵍⵎⴰⴷⵏ ⵉⴱⴹⴰⵏ ⵅⴼ 180 ⵏ ⵜⵎⵔⵙⵍⵜ.
ⵙ ⵓⴱⵔⵉⴷ ⵏ ⵓⵙⵡⵓⵔⵉ ⵏ ⵓⵙⵖⴰⵍ ⴰⵏⵎⵏⴰⴹ ⵏ ⵜⴰⵏⵏⴰⵢⵜ , ⵜⵉⵡⵉ ⴷ ⵜⴰⵏⴰⴹⵜ ⴰⴷ ⵅⴼ ⵓⵙⴼⵙⵉ ⵏ ⵓⵙⵡⵉⵔ ⵏ ⵜⵓⴽⴽⵉ ⵏ ⵉⵏⵍⵎⴰⴷⵏ ⵉⵎⵖⵔⴰⴱⵉⵢⵏ, ⵙ ⵜⵉⵥⵕⵉ ⵏ ⵉⵏⵎⵎⴰⵍⵏ ⵉⵚⴽⴰⵏ ⵅⴼ ⵓⵙⵉⴽⵙⵍ ⴷ ⵓⵙⵓⵏⴼⵓ ⴰⵏⵉⵎⴰⵏ ⵔⵏⵓ ⵢⴰⵙ ⵉⵏⵎⵎⴰⵍⵏ ⵉⵣⴷⵉⵏ ⴷ ⵜⵉⵔⵙⴰⵍ ⵏ ⵓⵎⵓⵔⵙ ⴰⵏⵎⵍⴰⵏ ⵙ ⵉⵎⵥⵍⵉ ⴳ ⵓⵙⵡⵉⵔ ⵏ ⵉⵙⴰⴳⵎⵏ ⵉⵎⴰⵣⵣⴰⵍⵏ ⵏ ⵓⵙⴳⵎⵉ ⴷ ⵜⵡⵏⵏⴰⴹⵜ ⵜⴰⵏⵎⵍⴰⵏⵜ ⴷ ⵜⴳⵔⴰⵡⴰⵏⵜ.
ⴰⴷ ⵏⵙⵙⴽⵜⵉ ⵉⵙ ⵉⵙⵙⴽⵔ ⵓⴳⵔⴰⵡ ⴰⵏⴰⵎⵓⵔ ⵏ ⵓⵙⵜⴰⵍ ⵖⵓⵔ ⵓⵙⵇⵇⵉⵎ ⴰⵏⴰⴼⵍⵍⴰ ⵉ ⵓⵙⴳⵎⵉ ⴷ ⵓⵙⵎⵓⵜⵜⴳ ⴷ ⵓⵔⵣⵣⵓ ⴰⵎⴰⵙⵙⴰⵏ, ⵜⴰⵏⴰⴹⵜ ⴰⴷ ⵙ ⵢⵉⵡⵙ ⵏ ⵜⵙⵏⵓⵔⴰⵢⵜ ⵏ ⵓⵙⵉⴹⵏ ⵏ ⵜⵏⵥⵕⵜ ⵉⴼⴹ-ⵍⵎⵖⵔⵉⴱ, ⴷ ⴽⵉⴳⴰⵏ ⵏ ⵉⵎⵓⵣⴰⵢ ⵏ ⵜⵎⵙⴷⵓⵙⵜ ⵏ ⵓⵎⵢⴰⵡⴰⵙ ⴷ ⵜⵉⴳⵎⵉ ⵜⴰⴷⴰⵎⵙⴰⵏⵜ.
