ⵉⵙⵏⵎⴰⵍⴰ ⵓⴳⵔⴰⵡ ⴰⵏⴰⵎⵓⵔ ⵏ ⵓⵙⵓⵜⴳ ⵖⵓⵔ ⵓⵙⵇⵇⵉⵎ ⴰⵏⴰⴼⵍⵍⴰ ⵉ ⵓⵙⴳⵎⵉ ⴷ ⵓⵙⵎⵓⵜⵜⴳ ⴷ ⵓⵔⵣⵣⵓ ⴰⵎⴰⵙⵙⴰⵏ, ⵙ ⵜⵎⴷⵔⴰⵡⵜ ⵏ ⵜⵙⵏⵎⴰⵍⴰⵢⵜ ⵏ ⵍⵓⵏⵉⵙⵉⴼ, ⵓⵙⵙⴰⵏ ⵏ 23 ⴷ 24 ⵏⵓⵡⴰⵏⴱⵉⵔ 2021, ⵢⴰⵜ ⵜⵉⵏⴰⵡⵜ ⵜⴰⵎⴰⴹⵍⴰⵏⵜ, ⵙ ⵜⵖⴰⵔⴰⵙⵜ ⵏ ⵓⵎⵢⴰⵡⴰⴹ ⵉⵎⵥⵕⵉ, ⵅⴼ « ⴰⵏⴱⴰⴹ ⵏ ⵜⵎⵔⵙⴰⵍ ⵜⵉⵙⵍⵎⴰⴷⵉⵏ : ⵉⵙⵡⵓⵜⵜⴰ ⴷ ⵓⵙⵓⵜⴳ ».
ⴰⵎⵓⵏ ⴳ ⵜⵉⵏⴰⵡⵜ ⴰⴷ ⴽⵉⴳⴰⵏ ⵏ ⵉⵎⵓⵣⴰⵢ ⵉⵥⵍⵉⵏ ⵙ ⵓⵙⴳⵎⵉ ⴷ ⵓⵏⴱⴰⴹ ⴰⵏⵎⵍⴰⵏ, ⴷ ⵉⵎⵙⴰⵔⴰⵙⵏ ⵏ ⵓⵣⵣⵉⴳⵣ ⵏⵏⵙ, ⵙ ⵓⴱⵔⵉⴷ ⵏ ⴽⵕⴰⴹ ⵉⵙⴳⵓⵎⵏ ⵉⴷⵙⵍⴰⵏⵏ : ⵜⴰⵎⴷⵔⴰⵡⵜ ⵏ ⵓⵔⵣⵣⵓ ⴰⵎⴰⴹⵍⴰⵏ ⴷ ⵓⵣⵎⵣⴰⵣⵣⴰⵍ ⴳⵔ ⵢⵉⵔⵎⵏ ⴳ ⵓⵢⵏⵏⴰ ⵉⵣⴷⵉⵏ ⴷ ⵜⵉⵍⴰⵍⵜ ⵏ ⵜⵎⵔⵙⴰⵍ ⵜⵉⵙⵍⵎⴰⴷⵉⵏ ⴰⴳⵓⵏⵙ ⵏ ⵓⵏⴳⵔⴰⵡ ⴰⵙⴳⵎⴰⵏ ; ⴷ ⵜⵉⵍⴰⵍⵜ ⵏ ⵉⵎⴳⴰⵢⵏ ⴷ ⵜⵙⴳⴳⵯⵉⵏ ⴰⴽⴽⵯ ⵢⴰⴹⵏ ⴳ ⵓⵣⵣⵉⴳⵣ ⴷ ⵜⵡⵓⵔⵉ ⵏ ⵜⵎⵔⵙⵍⵜ ⵜⴰⵙⵍⵎⴰⴷⵜ ; ⴷ ⵉⵎⴰⵙⵙⵏ ⵏ ⵓⵙⵓⵜⴳ ⵏ ⵜⵎⵔⵙⴰⵍ ⵜⵉⵙⵍⵎⴰⴷⵉⵏ.
ⴰⵡⵜⵜⴰⵙ ⵏ ⵜⴰⵏⴰⴹⵜ ⴰⴷ ⵉⴳⴰ ⴰⵙⵎⵏⵉⴷ ⴷ ⵜⵖⵓⵔⵉ ⵏⵡⴰⵏⴰⵡⵏ ⵏ ⵓⵏⴱⴰⴹ ⵏ ⵜⵎⵔⵙⴰⵍ ⵜⵉⵙⵍⵎⴰⴷⵉⵏ ⴷ ⵓⵙⵡⵓⵜⵜⵓ ⵏ ⵜⵖⴰⵔⴰⵙⵜ ⵏ ⵜⵎⵔⵓⵔⵜ ⵉ ⵉⵙⵓⵜⵓⵔⵏ ⵏ ⵓⵙⵖⵓⴷⴰ ⵏ ⵜⵡⵓⵔⵉⵡⵉⵏ ⵏ ⵓⵏⴳⵔⴰⵡ ⴰⵙⴳⵎⴰⵏ ⴳ ⵜⵎⵓⵔⵜ ⵏⵏⵖ. ⴰⵛⴽⵓ ⴰⵣⵓⵔⵜ ⴰⵏⵎⵢⵓⵔ ⴰⵎⵉⵔⴰⵏ ⵏ ⵓⵙⵏⵎⴰⵍⴰ ⵏ ⵜⵎⵔⵙⴰⵍ ⵜⵉⵙⵍⵎⴰⴷⵉⵏ ⴷ ⵓⵙⵙⵓⴳⵓⵔ ⵏⵏⵙⵏⵜ, ⵉⵥⵕⴰ ⵢⴰⵏ ⵡⴰⵥⵎ ⴰⵅⴰⵜⴰⵔ ⵙ ⵜⵎⵓⵖⵍⵉ ⵉ ⵜⵓⵚⴽⴰ ⵏⵏⵙⵏ ⵜⴰⵙⵏⵎⴰⵍⴰⵢⵜ ⴷ ⵜⵎⵙⵙⴼⵍⵜ ⴰⵢⵏⵏⴰ ⵉⵙⵙⴷⵔⵉⵙⵏ ⴳ ⵜⵏⵉⵎⴰⵏⵉⵜ ⵏ ⵜⵎⵔⵙⴰⵍ ⴷ ⵜⵡⵓⵔⵉ ⵏⵏⵙⵏⵜ ⵙ ⵓⴷⵔⵉⵣ ⵏ ⵓⵙⵎⴰⵜⴰ ⵏ ⵓⵙⵍⵎⴷ ⴷ ⵓⵣⵣⵉⴳⵣ ⵏ ⵜⵙⵔⵜⴰⵢ ⴷ ⵜⵡⵏⵏⴰⴹⵜ ⵜⴰⵏⵎⵍⴰⵏⵜ, ⴳ ⵓⵣⵎⵣ ⴳ ⵙⵙⵓⴷⵓⵏⵜ ⴽⵉⴳⴰⵏ ⵏ ⵜⵎⵓⵔⴰ ⴳ ⵓⴱⵔⵉⴷ ⵏ ⵓⵏⴱⴰⴹ ⴷ ⵜⵓⴽⴽⵉ ⵏ ⵜⵏⵉⵎⴰⵏⵜ ⵓⴳⴰⵔ ⵉ ⵜⵎⵔⵙⴰⵍ ⵜⵉⵙⵍⵎⴰⴷⵉⵏ, ⴷ ⵜⵓⴽⴽⵉ ⵏⵏⵙⵏⵜ ⵜⴰⵣⵎⵔⵜ ⵓⴳⴰⵔ ⵏ ⵓⵙⵡⵓⴷⴷⵓ.
ⵔⴰⴷ ⵢⵉⵍⵉ ⴳⵔ ⵜⵡⵓⵔⵉⵡⵉⵏ ⵏ ⵜⵉⵏⴰⵡⵜ, ⵓⵙⵎⵏⵉⴷ ⵏ ⵡⴰⴷⴷⴰⴷ ⴰⵎⵉⵔⴰⵏ ⵏ ⵉⵙⵎⵏⵉⴷⵏ ⵉⵎⴰⴹⵍⴰⵏⵏ ⴳ ⵓⵢⵏⵏⴰ ⵉⵣⴷⵉⵏ ⴷ ⵓⵏⴱⴰⴹ ⵏ ⵜⵎⵔⵙⴰⵍ ⵜⵉⵙⵍⵎⴰⴷⵉⵏ ⵙ ⵓⴱⵔⵉⴷ ⵏ ⵓⵙⴼⵙⵔ ⵏ ⵜⵢⴰⴼⵓⵜⵉⵏ ⵜⵉⵎⴰⵢⵏⵓⵜⵉⵏ ⵏ ⵢⵉⵏⵉⴳⵏ ⴰⴽⴰⴷⵉⵎⵉⵢⵏ ⴷ ⵢⵉⵔⵎⵏ ⵉⵥⵍⵉⵏ ⵙ ⵜⵡⵓⵔⵉⵡⵉⵏ ⵜⵉⵜⵔⴰⵔⵉⵏ ; ⴷ ⵓⵙⵡⵉⵏⴳⵎ ⴷⵉⵖ ⴰⴳⵔⴰⵡⴰⵏ ⴰⴽⴷ ⴰⵢⵜ ⵜⵖⵜⴰⵙⵜ, ⴷ ⵉⵎⴳⴰⵢⵏ ⵉⵎⵖⵔⴰⴱⵉⵢⵏ ⴳ ⵓⵏⴳⵔⴰⵡ ⴰⵙⴳⵎⴰⵏ ⴰⵎⵖⵔⴰⴱⵉ, ⴰⵡⴷ ⵉⴱⵕⵕⴰⵏⵉⵢⵏ ⴷ ⵉⵎⵓⵣⴰⵢ, ⴳ ⵜⴼⴰⴷⵉⵡⵉⵏ ⵉⵣⴷⵉⵏ ⴷ ⵜⵎⵔⵙⵍⵜ ⵜⴰⵙⵍⵎⴰⴷⵜ ⵏⵏⴰ ⴷⴰ ⵉⵙⵓⵔⵙⵏ ⵜⵉⴼⵉⴽⴽⴰⵛ ⵏⵖ ⴷⴰ ⵜⵙⵙⴱⴱⵖⴰⵙ ⵜⴰⵏⵉⵎⴰⵏⵜ ⵏ ⵜⵎⵔⵙⵍⵜ ⵜⴰⵙⵍⵎⴰⴷⵜ, ⴷ ⵜⵕⵡⵉ ⵏ ⵓⵙⴳⵎⵉ ; ⴳ ⵜⴳⵉⵔⴰ ⴰⵎⵙⴳⴷⴰⵍ ⵅⴼ ⵜⵖⴰⵔⴰⵙⵜ ⵏ ⵓⵙⵓⵜⴳ ⵏ ⵓⵏⴱⴰⴹ ⴰⵏⵎⵍⴰⵏ ⴷ ⵓⴷⵖⴰⵔ ⵏ ⵉⵎⴳⴰⵢⵏ ⴳ ⵜⵡⵓⵔⵉ ⵏ ⵓⵙⵓⵜⴳ.
VISITER LE SITE DU WEBINAIRE