ⵜⴻⵜⵜⵓⵙⴽⵔ ⴰⵙⵙ ⵏ 16 ⵏⵓⵡⴰⵏⴱⵉⵔ 2022, ⴳ ⵓⵙⵇⵇⵉⵎ ⵏ ⵓⵙⵇⵇⵉⵎ ⴰⵏⴰⴼⵍⵍⴰ ⵉ ⵓⵙⴳⵎⵉ ⴷ ⵓⵙⵎⵓⵜⴳⴳ ⴷ ⵓⵔⵣⵣⵓ ⴰⵎⴰⵙⵙⴰⵏ, ⵜⴼⵓⴳⵍⴰ ⵏ ⵓⵣⵣⵔⴰⵢ ⵏ ⵜⵏⴱⴰⴹⵉⵏ ⴳⵔ ⵎⴰⵙⵙ ⵄⵓⵎⴰⵕ ⵄⵣⵣⵉⵎⴰⵏ, ⴰⵏⵙⵙⵉⵅⴼ ⵉⵣⵡⴰⵔⵏ ⵏ ⵓⵙⵇⵇⵉⵎ, ⴷ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⵏⵏⴰ ⵉⵙⵔⵙ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴷ ⵡⵉⵙⵙ ⵙⴹⵉⵙ, ⵕⴱⴱⵉ ⴰⴷ ⴰⵙ ⵢⴰⵡⵙ, ⴰⵙⵙ ⵏ 14 ⵏⵓⵡⴰⵏⴱⵉⵔ 2022, ⴷ ⴰⵏⵙⵙⵉⵅⴼ ⴰⵎⴰⵢⵏⵓ ⵏ ⵜⵎⵔⵙⵍⵜ ⴰⴷ ⵜⴰⴷⵓⵙⵜⵓⵔⵉⵜ.
ⵉⵡⵏⴰⵏ ⵏ ⵓⵏⵎⵓⴳⴳⴰⵔ ⵉⵜⵜⵓⵙⵏⵎⴰⵍⴰⵏ ⵙ ⵓⵣⵎⵣⵣⵓ ⵢⴰⴷ, ⵙ ⵢⵉⵍⵉ ⵏ ⵉⵎⵙⵜⴳⴳⴰⵔⵏ ⴷ ⵉⵎⵙⵖⴰⵏⵏ ⵏ ⵓⵙⵇⵇⵉⵎ, ⵉⵏⵏⴰ ⵎⴰⵙⵙ ⵄⵓⵎⴰⵕ ⵄⵣⵣⵉⵎⴰⵏ ⵜⴰⴳⵓⵔⵉ, ⵉⵙⵎⵏⵉⴷ ⴷⵉⴳⵙ ⵜⵉⴳⵓⵔⵉⵡⵉⵏ ⵏ ⵡⴰⵢⵢⵓⵣ ⵉ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⵅⴼ ⵜⵎⵢⴰⵎⴰⵏⵜ ⵜⴰⴳⵍⴷⴰⵏⵜ ⵏⵏ ⵢⴰⵙ ⵉⵜⵜⵓⴼⴽⴰⵏ, ⴰⵔ ⵉⵙⵙⵉⵜⵉⵎ ⴰⵎⵓⵔⵙ ⴳ ⵜⵎⵙⵜⴳⴳⴰⵔ ⴷ ⵜⵙⵎⵉⴳⵍⵉⵏ ⵜⵉⵎⵇⵔⴰⵏⵉⵏ ⵏⵏⵙ, ⵉⵏⵏⴰ « ⴼⵔⵃⵖ ⴰⵙⵙⴰ ⵍⵍⵉⴳ ⵣⵣⵔⵉⵖ ⵜⴰⵙⴰⴼⵓⵜ ⵉ ⵎⴰⵙⵙ ⵍⵃⴱⵉⴱ ⵍⵎⴰⵍⴽⵉ, ⵏⵏⴰ ⵣⵡⴰⵔ ⵢⵓⵙⵉⵏ ⴽⵉⴳⴰⵏ ⵏ ⵜⵎⵙⵜⴳⴳⴰⵔ ⵜⵉⵏⴰⵎⵓⵔⵉⵏ, ⴳ ⵓⵢⵏⵏⴰ ⵉⵣⴷⵉⵏ ⴷ ⵢⵉⴳⵔ ⴰⵙⵔⵜⴰⵏ ⵏⵖ ⴰⴽⴰⴷⵉⵎⵉ ⵏⵖ ⴰⴳⵓⵏⵙ ⵏ ⵉⴳⵔⴰⵡⵏ ⵉⵎⵣⵣⵉⴳⵔⵏ ⵏⵖ ⵓⵣⵔⵉⴼⵏ ⵏⵖ ⵖⵓⵔ ⵉⴳⵔⴰⵡⵏ ⵉⵎⵛⴰⵡⵕⵏ ».
ⵉⴱⴷⵔ ⵎⴰⵙⵙ ⵄⵣⵣⵉⵎⴰⵏ, ⵉⵡⵏⴰⵏ ⵏ ⵓⵢⴰⴷ, ⵉⵙ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⵉⴽⴽⴰ ⵢⵓⵙⵉ ⴰⴳⴳⵯⴰ ⵏ ⵜⵎⴰⵡⵙⴰⵙⵜ ⵏ ⵓⵙⴳⵎⵉ ⴰⵏⴰⵎⵓⵔ ⵉ ⴽⵉⴳⴰⵏ ⵏ ⵉⵙⴳⴳⵯⴰⵙⵏ, ⵉⵏⵙⵙⵉⵅⴼ ⴰⵙⵇⵇⵉⵎ ⵏ ⵉⵎⴰⵔⴰⵏ ⵏⵏⴰ ⵉⵙⴳⵎⴹⵏ ⵉⵡⵏⴰⵏ ⵏ ⵓⵏⵙⵙⵉⵅⴼ ⵏⵏⵙ ⵉ ⵓⵙⵍⴳⵏ ⴰⵙⴰⵜⵉ ⵉⵣⴷⵉⵏ ⴷ ⵓⵙⴳⵎⵉ ⴷ ⵓⵙⵎⵓⵜⵜⴳ, ⵏⵏⴰ ⴷ ⵉⴼⴼⵖⵏ ⵉⴳⴰ ⴰⵙⵍⴳⵏ ⴰⵣⵓⵛⵛⵍ ⵉ ⴽⵓⵢⴰⵏ, ⵜⴰⵎⵓⵖⵍⵉ ⵜⴰⵙⵜⵕⴰⵜⵉⵊⵉⵜ ⵏ ⵓⵙⵓⵖⴷ ⵏⵏⴰ ⵉⵙⵔⵙⵏ ⴰⴱⵔⵉⴷ ⵉ ⵓⵙⵓⵖⴷ ⵏ ⵓⵏⴳⵔⴰⵡ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ ⴳ ⵜⵎⵓⵔⵜ ⵏⵏⵖ.
ⵉⵙⵙⵎⵖⵓⵔ ⴷⵉⵖ ⵙ ⵜⵡⵓⵔⵉ ⵏⵏⴰ ⵙⴽⴽⵔⵏ ⵉⴳⵎⴰⵎⵏ ⵏ ⵜⵙⵓⵜⵍⵜ ⵜⵓⵣⵔⵉⴼⵜ ⵉⵣⵔⵉⵏ ⴷ ⵉⵙⴰⵜⵉⵏ ⵏ ⵓⵙⵇⵇⵉⵎ, ⵅⴼ ⵓⵢⵏⵏⴰ ⵙⵙⴽⵔⵏ ⵉ ⵜⵏⴰⴼⵓⵜ ⵏ ⵜⵉⵏⵎⵍ ⵜⴰⵎⵖⵔⴰⴱⵉⵢⵜ, ⵉⵏⵏⴰ ⴷⵉⵖ ⵉⵙ « ⵉⵎⴰⵏ ⴷ ⵜⴼⵍⵙⴰⴼⵜ ⵏⵏⴰ ⵉⵙⴼⴰⵡⵏ ⵜⴰⵡⵓⵔⵉ ⵏ ⵓⵙⵇⵇⵉⵎ ⴳ ⵓⵙⵡⵉⵔ ⵉⵣⵔⵉⵏ, ⵜⵍⵍⴰ ⵜⴳⴰ ⴰⵎⵙⵎⵓⵙⵙ ⴰⴷⵙⵍⴰⵏ ⵏ ⵜⵡⵓⵔⵉ ⵏⵏⵖ, ⵉⴳⴰ ⴰⵙⵔⵓⵙ ⵏ ⵜⵎⵔⵙⵍⵜ, ⵏⵏⴰ ⵔⴰⴷ ⵢⵉⵍⵉ ⵙ ⵜⵓⵎⴰⵢⵉⵏ ⵏⵏⵙ ⵉⴳⴳⵓⵜⵏ, ⴷ ⵜⵖⴰⵔⴰⵙⵜ ⵏⵏⵙ ⵜⴰⵎⴷⵔⴰⵡⵜ, ⴷ ⵓⵙⵡⵉⵏⴳⵎ ⵏⵏⵙ ⴰⵙⵟⵔⴰⵜⵉⵊⵉ, ⴷ ⵜⴰⵏⵏⴰⵢⵉⵏ ⵏⵏⵙ ⵜⵉⵎⵙⵖⵓⵔⴰ, ⴷ ⵉⵙⵓⵎⵓⵔⵏ ⵏⵏⵙ ⵉⵎⵚⴽⴰⵡⵏ, ⴰⵙⴳⵓⵎ ⵏ ⵓⵙⵙⵎⵖⵓⵔ ⴷ ⵢⵉⴽⵣ ⵏⵏⴰ ⵜⵜ ⵉⵙⵙⵉⵖⵉⵢⵏ ⴰⴷ ⵜⴰⵎⵓ ⴳ ⵓⵙⵓⴳⵜ ⵏ ⵓⵏⴳⵔⴰⵡ ⵏⵏⵖ ⴰⵎⵙⴳⵎⴰⵏ, ⴰⵢⴰ ⵉⵜⵜⵓⵙⴽⵔ ⵉⵡⵏⴰⵏ ⵏ ⵜⵎⵓⵖⵍⵉ ⵜⴰⵙⵟⵔⴰⵜⵉⵊⵉⵜ ⴷ ⵎⴰ ⵜⵜ ⵉⴹⴼⴰⵕⵏ ⵏ ⵜⵏⴰⴹⵉⵏ ⵜⵉⵙⴳⵓⵎⴰⵏⵉⵏ ⴷ ⵜⵉⵢⴰⴹ ⵜⵉⵙⵓⵜⴳⵉⵏ ⴷ ⵜⴰⵏⵏⴰⵢⵉⵏ ».
ⴳ ⵜⵙⴳⴰ ⵏⵏⵙ, ⵉⵏⵏⴰ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⵉⵡⵏⴰⵏ ⵏ ⵓⵎⵙⴳⵔⴰⵡ, ⴰⴱⵓⵔⵣ ⵏⵏⵙ ⵙ ⵜⵎⵢⴰⵎⴰⵏⵜ ⵜⴰⴳⵍⴷⴰⵏⵜ ⵏⵏⴰ ⵢⴰⵙ ⵉⵜⵜⵓⴼⴽⴰⵏ ⵏ ⵓⵙⵡⵓⵔⵉ ⴳ ⵓⴷⵖⴰⵔ ⵏ ⵓⵏⵙⵙⵉⵅⴼ ⵏ ⵜⵎⵔⵙⵍⵜ ⵜⴰⴷⵓⵙⵜⵓⵔⵉⵜ ⵙ ⵡⴰⵜⵉⴳ ⵏ ⵓⵙⵇⵇⵉⵎ ⴰⵏⴰⴼⵍⵍⴰ ⵉ ⵓⵙⴳⵎⵉ ⴷ ⵓⵙⵎⵓⵜⴳⴳ ⴷ ⵓⵔⵣⵣⵓ ⴰⵎⴰⵙⵙⴰⵏⵏ ⵉⵙⵙⴽⵜⵉ ⴷⵓⵖ ⵜⵉⵅⵉⵜⵔⵜ ⵏ ⵜⵎⵍⵙⵜⴷⴷⴰⵔⵜ ⵏⵏⴰ ⵢⵓⵙⵉ ⴳ ⵓⵡⵜⵜⴰⵙ ⵏ ⵓⵙⵎⵓⵙⵙ ⵏ ⵉⵙⵎⵏⴰⴷⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵉ ⵜⵏⴽⵔⴰ ⵙ ⵜⵉⵏⵎⵍ ⵜⴰⵎⵔⴰⴱⵉⵢⵜ.
ⵉⵣⵣⵔⵉ ⵎⴰⵙⵙ ⵍⵎⴰⵍⴽⵉ ⴽⵉⴳⴰⵏ ⵏ ⵓⵣⵎⵣ ⴳ ⵜⴳⵓⵔⵉ ⵏⵏⵙ ⵉ ⵓⵙⴱⵖⵙ ⴷ ⵓⵙⵏⵎⵎⵔ ⵉ ⵎⴰⵙⵙ ⵄⵓⵎⴰⵕ ⵄⵣⵣⵉⵎⴰⵏ, ⵅⴼ ⵡⴰⴳⴳⵯⴰ ⴰⴽⴽⵯ ⵢⵓⵙⵉ ⴳ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⴼⵍⵍⴰ ⵉ ⵓⵙⴳⵎⵉ ⴷ ⵓⵙⵎⵓⵜⴳⴳ ⴷ ⵓⵔⵣⵣⵓ ⴰⵎⴰⵙⵙⴰⵏ ⴳ ⵓⵣⵎⵣ ⵉⵣⵔⵉⵏ, ⵢⴰⴷⴷ ⵅⴼ ⵢⵉⵎⴰⵏ ⵉⵏⴰⵎⵓⵔⵏ ⵉⵅⴰⵜⴰⵔⵏ, ⴷ ⵢⵉⴽⵉ ⴷ ⵜⵎⵙⵜⴳⴳⴰⵔⵜ ⵜⴰⵅⴰⵜⴰⵔⵜⵏ, ⴷ ⵡⴰⵜⵉⴳⵏ ⵉⵏⴼⴳⴰⵏⵏ ⵉⵎⵇⵔⴰⵏⵏ ⵏⵏⴰ ⵙ ⵉⵜⵜⵓⵢⴰⵙⵙⵏ ⵎⴰⵙⵙ ⵄⵣⵣⵉⵎⴰⵏ.
ⵢⴰⴷⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⴰⵏⴰⴼⵍⵍⴰ ⵉ ⵓⵙⴳⵎⵉ ⴷ ⵓⵙⵎⵓⵜⴳⴳ ⴷ ⵓⵔⵣⵣⵓ ⴰⵎⴰⵙⵙⴰⵏ ⵅⴼ ⵜⵖⴰⵔⴰⵙⵜ ⵏ ⵜⵡⵓⵔⵉ ⵉⵡⵏⴰⵏ ⵏ ⵜⵉⴽⵍⵉ ⵏ ⵉⵎⴰⵍ ⵉⵙ ⵔⴰⴷ ⵜⵚⴽⵓ ⵅⴼ ⵜⵔⵙⴰⵍ ⵏ ⵓⵎⵢⴰⴷⴰⵙ ⴰⵎⴷⵔⴰⵡ, ⴷ ⵓⵎⵢⴰⵡⴰⵙ, ⴷ ⵓⵎⵎⵣⴷⴰⵢ ⴰⴽⴷ ⵉⴳⵔⴰⵏ ⴰⴽⴽⵯ ⵉⵡⴰⵏⴽⵏ ⵉⵣⴷⵉⵏ ⴷ ⵢⵉⴳⵔ ⴰⴷ, ⵔⵏⵓ ⵢⴰⵙ ⴰⵙⴱⵓⵖⵔ ⵙⴳ ⵓⵙⵎⵓⵜⵜⵔ ⴰⵅⴰⵜⴰⵔ ⵏⵏⴰ ⵉⵙⵙⴽⵔ ⵓⵙⵇⵇⵉⵎ ⵉⵙⴳⴳⵯⴰⵏ ⴰⴽⴽⵯ ⵉⵣⵔⵉⵏ, ⴷ ⵓⴹⵎⴰⵏ ⵏ ⵓⵣⵣⵉⴳⵣ ⵏⵏⵙ ⴷ ⵜⵎⵔⵙⵍⵜ ⵏ ⵓⵙⵡⵉⵏⴳⵎ ⴰⵙⵟⵕⴰⵜⵉⵊⵉ ⴳ ⵜⵎⵙⴰⵔⵉⵏ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ, ⴳ ⵓⵎⵏⵉⴷ ⵏ ⵢⵉⵡⴹ ⵖⵔ ⴰⵙⵉⵜⵎ ⴰⴳⵍⴷⴰⵏ ⴰⵎⴰⵜⴰⵢ, ⵏ ⵢⵉⵡⴹ ⵏ ⵜⵉⵏⵎⵍ ⵜⴰⵎⵖⵔⴰⴱⵉⵢⵜ ⵏⵏⴰ ⵉⵍⴰⵏ ⴰⵜⵉⴳⵏ ⵏ ⵜⵕⵡⵉ ⴷ ⵓⵙⵙⴰⵎⵓ ⴷ ⵓⵙⵙⵎⵖⵓⵔ.